Сэтинньи ый 9 күнүгэр А.Ф. Шестаков аатынан Норуот айымньытын дьиэтигэр "Айыы киһитэ аһыныгар" диэн соторутааҕыта соһуччу олорор дьиэлэрэ олоччу уокка былдьаммыт Мария уонна Николай Большаковтар, Саргылаана уонна Валерий Тимофеевтар дьиэ кэргэттэригэр ыарахан түгэҥҥэ көмө оҥорор сыаллаах аһымал-концерт буолан ааста. 200 киһи кыттыылаах нэһилиэк уус-уран самодеятельнаһын концерыгар кыттыыны ыллылар: "Ньургуһун" Народнай үҥкүү коллектива, "Дьүөгэлэр" народнай вокальнай ансаамбыл, Намнааҕы народнай театр,  "Эҥсиэли хотуттара", "Нарыйаана", "Добун", "Одун" вокальнай ансаамбыллар, "Далбар", "Кыталыына" үҥкүү ансаамбыллара, "Бининс" И.Е. Винокуров аатынан студенческай этэрээт, "Чэбдик" А.Н. Окоемов аатынан "Мичээр" Россия образцовай народнай үҥкүү коллективын аҕа саастаах бөлөҕө,  И.С. Гаврильев аатынан 1 №Намнааҕы орто оскуола 2б, 4а кылаастарын үҥкүүлэрин коллективтара, "Ровесник" оскуола общественнай түмсүүтэ, солистар Камила Калачева, Мичил Афанасьев, эстрада ырыаһыттара Дана Парникова, Алена Дива, Анатолий Горохов уонна Нам улууһун Парикмахердарын түмсүүтэ кэрэ кыргыттарга киэһээҥи бүрүчүөскэлэрин көрдөрдүлэр.  Ону сэргэ, "Полка добра" үлэлээтэ. Онно "Ленскэй нэһилиэк" муниципальнай тэриллии дьаһалтата, И.С. Гаврильев аатынан 1 №Нам орто оскуолата,  Нам улууһунааҕы кырдьаҕастар дьиэлэрин тэрилтэтэ, "Сулусчаан" Оҕо саадын коллектива уонна урбаанньыттар айар бөлөҕө - "Энсиэли хотуттара" вокальнай ансаамбыл мал-сал, таҥас-сап уурдулар. Концертка киирии билиэттэринэн 42000 киирбит уонна аһымал дьааһыктарга биирдиилээн дьонтон угуллубут харчыны Большаковтар, Тимофеевтар дьиэ кэргэттэригэр туттарылынна. 

Бу аһымал тэрээһиҥҥэ кэлэн, кыттыыны ылбыт бары айар куттаах дьоммутугар, сааланы толору кутуллан кэлбит  көхтөөх көрөөччүлэрбитигэр барҕа махталбытын биллэрэбит. Бу курдук, куруутун түмсүүлээх буолуоҕуҥ, ыарахан балаһыанньаҕа түбэспит биир дойдулаахтарбытын куруутун өйүү, ыарахан түгэннэригэр көмөлөһө туруоҕуҥ.