Кулун тутар ый 3с күнүгэр А.Ф. Шестаков аатынан Сынньалаҥ Кииҥҥэ, сааскы маҥнайгы бырааһынньыгы көрсө, Саха сирин бастакы композитордарыттан биирдэстэрэ, биир дойдулаахпыт Захар Порфирьевич Винокуров 95 сылыгар аналлаах «Далбар Хотун ырыата» улуустааҕы конкурс буолла. Нам улууһугар олохтоох ааптардар ырыаларын көрөөччү-истээччи киэҥ биһирэбилигэр тарҕатар, тэриллибит айар куттаах ырыа бөлөхтөрүн салгыы сайыннарыыга көҕүлүүр, үрдүк ситиһиилэргэ суол арыйар сыаллаах конкурспут республикаҕа киэҥник биллэр, Нам улууһа киэн туттар «Дьүөгэлэр» народнай вокальнай ансаамбылын көҕүлээһининэн тэрилиннэ.

Үһүс сылын ыытыллар конкурска 8 ансаамбыл кыттыыны ылла. Ол курдук, Модут, Граф биэрэгэ, Аппааны, Таастаах, Партизан уонна Нам нэһилиэктэрин дьахталларын ансаамбыллара, балаһыанньа быһыытынан иккилии ырыаны толордулар. Бастакы толоруу – композитор З.П. Винокуров ырыаларыттан, иккис толоруу – көҥүл темаҕа.

Конкурсу ССРС культуратын туйгуна, Саха Өрөспүүбүлүкэтин культуратын Үтүөлээх үлэһитэ, Нам улууһун культуратын Бочуоттаах үлэһитэ, «Туллук хаара» Нам улууһун мелодистарын түмсүүтүн салайааччыта, «Ньургуһун» народнай хор хормейстера, самодеятельнай композитор, Нам улууһун уонна Таастаах нэһилиэгин Ытык Киһитэ, культура эйгэтигэр 40-тэн тахса сылын эҥкилэ суох үлэлии сылдьар Е.А. Кутукова эҕэрдэ тылынан арыйда.

Дьүүллүүр сүбэҕэ олордулар: СР культуратын туйгуна, З.П. Винокуров аатынан Оҕо искусстватын оскуолатын преподавателя, «Дүөгэлэр» народнай вокальнай ансаамбыл кыттааччыта У.К. Новгородова, «Дүөгэлэр» народнай вокальнай ансаамбыл кыттааччыта, солистката И.Е. Иванова, СР культуратын туйгуна, З.П. Винокуров аатынан Оҕо искусстватын оскуолатын Фортепиано отделениятын салайааччыта, «Дүөгэлэр» народнай вокальнай ансаамбыл кыттааччыта Е.П. Новгородова.

Ансаамбыллар бу конкурса эрдэттэн бэлэмнэнэннэр, ырыа толоруутун маастарыстыбатын, сценаҕа тутта-хапта сылдьыыны, таҥаһы-сабы, кэрэ сэбэрэни оҥостон, ис-сүрэхтэн тахсар ырыалары күндү көрөөччүлэригэр бэлэхтээтилэр. Олохтоох автордар ырыаларын куруутун даҕаны киэҥ эйгэҕэ таһааран, дохсун ытыс тыаһынан биһирэнэн, профессиональнай толорууга чочуйуллан, өссө даҕаны салгыы сайдан, республиканскай, российскай уонна аан дойдутааҕы ырыа конкурстарыгар кыттан, үрдүк таһымҥа тахсалларыгар «Далбар Хотун ырыата» сүрүн олук буолла.

Түмүгэр:

Гран-при – «Эҥсиэли хотуттара», Нам, сал. Ирина Неустроева;

I истиэпэннээх Лауреат – «Нарыйаана», Нам, сал. Елена Кутукова;

II истиэпэннээх Лауреат – «Ивушка», Граф биэрэгэ, сал. Анна Охлопкова;

III истиэпэннээх Лауреат – «Күбэйэ», Модут, сал. Евдокия Куличкина-Шамаева;

I истиэпэннээх Дипломант – «Иэйии», Нам, сал.Татьяна Гурьева;

II истиэпэннээх Дипломант – «Дьиэрэйэ», Таастаах, сал. Наталья Замаратская;

III истиэпэннээх Дипломант – «Далбар», Аппааны, сал. Саргылана Пономарева.

«Биһирэмнээх куоластар» анал аат иҥэрилиннэ «Ивушка» ансаамбылга;

«Сайаҕастай куоластар» анал аат «Хомус» ансаамбылга, Партизан, сал. Мария Аргунова;

«Олохтоох автор ырыаларын тарҕатааччы» анал аат «Нарыйаана» ансаамбылга;

«Кыайыыга дьулуур» анал аат «Дьиэрэйэ» ансаамбылга иҥэрилиннилэр.

Бу курдук, Эҥсиэли хочотугар ырыа куттаах кэрэ аҥардар бөлөхтөрө олус кэрэ түгэни, өрө көтөҕүллэн туран, атаардылар. Кыайыылаахтарга уонна бары номинаннарга, салайааччыларга, дьүүллүүр сүбэҕэ уонна көхтөөх көрөөччүлэргэ тэрийэр бөлөх аатыттан барҕа махтал тылларын аныыбыт.

Иһирэх ырыалар нарын куолас долгунугар

Иэйиилээхтик кутулланнар,

Ыллам олоҕу ыллата, туойа,

Ымыылаах эҕэрдэлиин эҥэрдэстиннэр!