Ыам ыйын 9 күнүгэр Нам киин уулуссатыгар Ржев куораты өстөөхтөн босхолуур туһугар тыыннарын толук уурбут саха буойуттарыгар кэриэстэбил скверга Кыайыы 74 сылын өрөгөйдөөх Парадын саҕалааһын тэрээһинэ ыытылынна. Сарсыардаттан Кыайыы Знамя, кыһыл былаах, сибэкки дьөрбөтө, Кыайыыны уһансыбыт Сэрии бэтэрээннэрин мэтириэттэрэ тутуурдаах оҕолуун-улаханныын дьон түмүстэ. Икки сыллаах Ржевтээ5и сэриигэ Нам улууһуттан 79 буойун тыын былдьаһыктаах уоттаах кыргыһыыга кыттыбыта. Ржев куорат немецкэ-фашитскай сэриилэртэн босхоломмута 76 сылын, Аҕа дойду сэриитигэр Кыайыы өрөгөйдөөбүтэ 74 сылын бэлиэтиир сүҥкэн суолталаах үөрүүлээх түгэҥҥэ «Нам улууһа» МТ баһылыга Ю.И. Слепцов, «Лиэнскэй нэһилиэк» МТ баһылыга А. Г. Новгородов, «Нам улууһа» МТ депутаттарын Сэбиэтин председателя И.Р. Попов, «Ленскэй нэһилиэк» МТ ветераннарын Сэбиэтин предедателя Д.М. Елисеев, «Лиэнскэй нэьилиэк» МТ депутаттарын Сэбиэтин председателя А.В. Кириллин, «Лиэнскэй нэһилиэк» МТ дьаһалтатын Ыччаты кытта үлэҕэ специалиһа А.А.Афанасьев Кэриэстэбил гирляндатын уурдулар, эҕэрдэ, Улуу Кыайыыны уһансыбыт Тыыл ветераннарыгар, Сэрии оҕолоругар, тулаайахтарыгар, огдооболоругар, Чурапчы көһүүтүн кыттыылаахтарыгар кытаанах санааларынан, күүстээх дьулуурдарынан бу биһиги дьоллоох олохпутун түстээбиттэригэр махтал эттилэр. Бары сүһүөххэ туран, охсуһуу толоонугар охтубут эдэркээн буойуттары бу түгэҥҥэ кэриэстээн, биир мүнүүтэ УЛУУ ЧУУМПУГА иһийдилэр. Ол кэннэ, ньиргийэр өрөгөй маршы кытта Парад дьоно субуруһан, Кыайыы скверыгар хаамтылар. Колонналары хамаандалаата - Нам улууһун Военнай комиссара Олег Анатольевич Возный. Кыайыы 74 сылын өрөгөй Парадын Нам 2N орто оскуолатын үөрэнээччилэрэ, Юнармия байыастара Кыайыы Знамятын өрө тутан, Парады арыйдылар.