Нам киинигэр, муус устар 19 күнүгэр, А.Ф. Шестаков аатынан Норуот айымньытын дьиэтигэр ураты саҥа сүүрээннээх, тэтимнээх тэрээһин тэрилиннэ. Ол курдук, Нам улууһугар Культура эйгэтигэр араас салааларга үлэлии-хамсыы сылдьар айар куттаах үлэһиттэр кыттыылаах "Сулустар киэһэлэрэ" диэн СР Культуратын туйгуна, мелодистка, "Эҥсиэли хотуттара", "Долгураҥ", "Сулустаана", "Одун" вокальнай ансаамбыллар салайааччыта Ирина Неустроева бырайыагынан ыытылынна. Бу бырайыак хас биирдии тэрийээччигэ, кыттааччыга уонна көрөөччүгэ өрө көтөҕүллүүнү, саҥа ситиһиилэри аҕалла. Бырыйыак конкурс быһыытынан ыытылынна. Хас биирдии 7 паара кэрэттэн кэрэ ылбаҕай ырыалары, эрчимнээх үҥкүүлэри толорууга холонон, көрөөччүлэргэ суһумнуур сулустардаах, чаҕылыҥныыр дьэргэлгэннээх умнуллубат дьоро киэһэни бэлэхтээтилэр. Дьүүллүүр сүбэҕэ олордулар Дьокуускайтан СР Ыччат Политикатын, СР Үөрэҕириитин туйгуннара Саргылаана Неустроева, педагог, стилист-визажист, "СкинКолор" салон салайааччыта Анна Григорьева, Нам улууһуттан СР Культуратын туйгуна, СР Идэлээх сойууһун сайдыытыгар кылаатын иһин Бэлиэ хаһаайката Александра Парникова, СР Үөрэҕириитин туйгуна, ырыаҕа педагог Нюргуяна Сивцева. Хас биирдии кыттааччы толорор маастарыстыбатын, көстүүмүн көрөн-истэн, түмүккэ - "Бастыҥ ырыа толорооччу" Гран-при ааты ыллылар Мария Парникова, Роман Попов, кинилэргэ диплом, кубок уонна Турцияҕа путевка туттарылынна. "Бастыҥ үҥкүү толорооччу" уонна "Көрөөччү биһирэбилэ" үрдүк аат Ирина Неустроеваҕа, Павел Винокуровка иҥэрилиннэ, кинилэргэ эмиэ диплом, кубок уонна Турцияҕа путевка туттарылынна. "Обаятельная пара" - Софья Тихонова Николай Жирковтуун, "Гармоничная пара" Наталья Петрова Афанасий Ивановтуун, "Великолепная пара" Елизавета Болтунова Ньургун Федоровтыын, "Очаровательная пара" Мариянна Данилова Михаил Макаровтыын, Татьяна Алексей Дьячковскайдыын буоллулар. Дьүүллүүр сүбэ председателя Саргылаана Неустроева "Маннык ураты эйгэни, үөрүүнү, дуоһуйууну аҕалар "Сулустар киэһэлэрэ" проект эһиил кыттааччылара өссө элбээтин, өссө кэҥээтин" диэн алгыс тылын анаан туран, "Сараби-Травел" турфирматтан Турция дойдутугар 7 күннээх сынньалаҥҥа путевкаларын Мария Парниковаҕа, Роман Поповка, Ирина Неустроеваҕа, Павел Винокуровка, Татьяна Гаврильеваҕа уонна Михаил Макаровка туттарда, хас биирдии партнердар кэрэ аҥардарыгар сибэкки дьөрбөтүн бэлэхтээтилэр. Бу курдук, үҥкүү үрдүк искусстватыгар, ырыа ымыылаах иэйиитигэр хас биирдии кэлбит көрөөччүүнү, ыалдьыты "Сулустардаах киэһэ" сэргэхситтэ, сөхтөрдө, дьоллоото!