Ахсынньы 8 күнүгэр А.Ф.Шестаков аатынан Сынньалаҥ Кииҥҥэ 33-һүс сылын кэрэ эйгэҕэ бэриниилээхтик үлэлии сылдьар, Саха Республикатын культуратын туйгуна, республикаҕа биир биллэр бастыҥ аранжировщик, Сынньалаҥ Киин звукорежиссера Сергей Юрьевич Акимбетов үйэ аҥардаах үбүлүөйүнэн "Праздник музыки" диэн бэрт кэрэ, сэргэх уонна олус иэйиилээх концерты ырыа-үҥкүү сүгүрүйээччилэригэр, күндү көрөөччүлэригэр бэлэх уунна. Бу дьоро киэһэҕэ кыттыыны ыллылар Сергей Юрьевич салайар "Энсиэли-Records" студиятыгар дьарыктанар, ыкса алтыһар, бииргэ айымньылаахтыык үлэлиир эстраднай ырыаны толорооччу доҕотторо. Хас биирдии сценаҕа тахсар ырыаһыты көрөөччүлэр ытыс хабыллар тыаһынан көрүстүлэр. 

Сергей Юрьевич сүгүрүйээччилэригэр икки ырыаны бэйэтэ ыллаан соһутта даҕаны, сөхтөрдө даҕаны. Ону сэргэ, экраҥҥа оҕо эрдэҕинээҕиттэн саҕалаан бүгүҥҥү кэмнэргэ тиийэ айымньылаах үлэ кэрдиистэрин кэпсиир фотослайда концерт устатын тухары ситэри киэргэттэ. 

Кэрэ ырыа бырааһынньыгынан уонна Сергей Юрьевич үйэ аҥардаах үбүлүөйүнэн "Нам улууһа" МТ Культура уонна духуобунай сайдыы Управлениятыттан режиссер В.Е. Евсеев начальник Е.А. Заровняева илии баттааһыннаах "Почетный работник культуры Намского улуса" диэн үрдүк ааты өрөгөй талаан айхалланар дьоро киэһэтигэр, көрөөччүлэр дохсун ытыстарын тыаһыгар туттарда. Ону сэргэ, "Ленскэй нэһилиэк" МТ баһылыга А.Г. Новгородов нэһилиэк гербэтэ ойуулаах, көмүс дуйдаах илии чаһылаах Бочуоттаах грамота  уонна Сергей Юрьевич коллегалара, бииргэ алтыһар доҕотторо эҕэрдэ эриэккэһин, алгыс маанытын, бэлэх күндүтүн анаатылар.