Ахсынньы ый 2 күнүгэр "Ньургуһун" народнай үҥкүү-хор коллектива тэриллибитэ 55 сылын бэлиэтиир "Ньургуһун мин олохпор..." диэн юбилейдаах ахтыы киэһэтэ буолан ааста. "Ньургуһуну" бастаан төрүттээбит улуус Ытыктыыр дьоно - А.Ф. Шестаков, Р.Б. Кириллова уонна И.Л. Христофоров тустарынан бары кэлбит выпускниктар, ол саҕаттан алтыһан, ыкса доҕордоһон, кинилэргэ искусство уустук эйгэтигэр сыралаах иитиини ааспыт коллегалар сааланы толору кутуллан, 55 сыл устата "Ньургуһун" народнай коллектив үлэтин, ситиһиилэрин, араас кэмнэргэ көрдөөх түгэннэрин тустарынан аҕыннылар, күн бүгүнүгэр диэри махтаналларын, үрдүк холобур оҥостоллорун биллэрдилэр.

Юбилейнай ахтыы киэһэтэ олус сэргэхтик ааста. Икки күн иннинэ буолан ааспыт, Р.Б. Кириллова бирииһигэр "Огни танца" улуусааҕы конкурс Гран-при кыайыылаахтарыгар - I-Хомустаах нэһилиэгин Оҕо искусстватын оскуолатын «Күнчээн» ансаамбылыгар (сал. Туяра Мохова, Надежда Прокопьева) Роза Борисовна сиэнэ Екатерина Кириллова анал кубок туттарда. 

А.Ф. Шестаков кыыһа Фекла Афанасьевна Санникова уонна уола Анастас Афанасьевич Шестаков Сынньалаҥ Киин директорыгар Александра Алексеевна Парниковаҕа таһаарыылаах үлэтин, А.Ф. Шестаков үтүө аатын үрдүктүк тутан, айымньылаах үлэтин иһин Шестаковтар дьиэ кэргэн олохтообут стипендиятын туттардылар.

Ону таһынан, «Ньургуһун» народнай үҥкүү-хор коллективын салайааччытыгар Софья Маскимовна Тихоноваҕа, хормейстер Елена Александровна Кутуковаҕа, хореограф Мария Спартаковна Поповаҕа, коллектив үҥкүүһүттэригэр, ырыаһыттарыгар Саха Республикатын Культура уонна духуобунай сайдыы, Гражданскай инициатива Министрдэриттэн, Республикатааҕы Норуот айымньытын Дьиэтиттэн, «Нам улууһа» МТ  Баһылыгыттан,  Нам улууһун депутаттарын Сэбиэтин председателыттан, Улуустааҕы культура уонна духуобунай сайдыы Управлениятын начальнигыттан уонна «Ленскэй нэһилиэк» МТ Баһылыгыттан Бочуоттаах грамоталар, махтал суруктар туттарылыннылар.  

"Ньургуһун" народнай үҥкүү-хор коллектива тэриллибитэ 55 сылынан "Айар талааным аартыга" диэн иһирэх ахтыылардаах, хаартыскалардаах кинигэ уонна документальнай киинэ диискэтэ сүрэхтэнэннэр, хас биирдии ыҥырыылаах ыалдьыкка үөрүүлээх быһыыга-майгыга сэмэй бэлэх быһыытынан туттарылыннылар. Кинигэни бэчээккэ бэлэмнээтилэр С.М. Тихонова, Е.А. Кутукова, М.С. Попова, макет, компьютернай таҥыы С.Х. Слепцов. Кинигэ уонна диискэ "А.Ф. Шестаков аатынан Сынньалаҥ Киин" муиниципальнай бюджетнай тэрилтэ үбүлээһининэн таҕыста. 

Киэһэни иилээн-саҕалаан ыыттылар: Саха Республикатын культуратын Үөтүөлээх үлэһитэ Иннокентий Захарович Кривошапкин, Саха Республикатын культуратын туйгуна Раиса Николаевна Горохова, А.Ф. Шестаков аатынан Сынньалаҥ Киин үлэһиттэрэ Мария Алексеева, Алексей Кривогорницын. 

Хаартыскаҕа А.Ф. Шестаков бюһугар тураллар: хаҥастан Р.Б. Кириллова сиэнэ Екатерина Кириллова,  А.Ф. Шестаков кыыьа Ф.А. Санникова, И.Л.Христофоров кыыһа Ю.И. Христофорова. 

Саха АССР культуратын Үтүөлээх үлэһитэ, Саха АССР культуратын туйгуна, Нам улууһун Ытык Киһитэ, балетмейстер Роза Борисовна Кириллова бирииһигэр "Огни танца" улуустааҕы конкурс Гран-при хаһаайыттара - I-Хомустаах нэһилиэгин Оҕо искусстватын оскуолатын «Күнчээн» ансаамбыла. Салайааччы Туяра Мохова, Р.Б. Кириллова сиэнэ Екатерина Кириллова. 

Бу курдук, 55 сыл устата дьоҥҥо-сэргэҕэ кэрэни кэрэхсиир, норуот уус-уран айымньытын сыаннастарын сайыннаран, көлүөнэттэн көлүөнэҕэ тиэрдэр, көхтөөх олоҕу көҕүлүүр, талааннары кынаттаан көтүтэр "Ньургуһун" народанй үҥкүү-хор коллектива өссө даҕаны тэнийэн-кэтирээн, чэчирээн-чэлгийэн, дойдуга культура сайдыытыгар сүнкэн кылаатын киллэрэ турдун.