Бүгүн, Аан дойдутааҕы Оҕо көмүскэлин күнүгэр, Нам улууһун киинигэр Доҕордоһуу болуоссакка "Дьоллоох оҕо саас" диэн оҕо аймахха анаан үөрүүлээх тэрээһин буолла. Сарсыардаттан атыыһыттар, араас аттракционнар, Нам 23N Баһаарнай сулууспа байыастарын араас техникалара быыстапкаҕа турдулар. Нам нэһилиэгин 12 оҕо саада остуоруйалар персонажтарынан ох курдук оҥостон, маскарааттары кэтэн, дьэрэкээн шардары тутан парадтаан киирдилэр. Үөрүүлээх тэрээһини "Нам улууһа" МТ баһылыгын солбуйааччыта П.В. Абрамов, "Ленскэй нэһилиэк" МТ баһылыгын солбуйааччыта Т.Е. Охлопков уонна Нам улууһун Үөрэҕириитин Управлениятын начальнигын солбуйааччыта Дь.И. Баишев арыйдылар. "Ылыыр-туойар чөмчүүк саас" Республикаҕа, улууска араас конкурстарга Гран-при, лауреат, дипломант аатын ылбыт нэһилиэктэр оҕо саадтарын иитиллээччилэрин концера буолла. Ону сэргэ, ССРС культуратын туйгуна, СӨ культуратын Үтүөлээх үлэһитэ, СӨ суруйааччыларын сойууһун чилиэнэ, кыраайы үөрэтээччи, СӨ ырыа айааччыларын сойууһун чилиэнэ, Нам улууһун Ытык Киһитэ, хас даҕаны кинигэ ааптара Иван Афанасьевич Бубякин-Чөҥөчөх айымньыларыгар «Хоһоонноох уруһуй оһуордара» оҕолорго уруһуй уонна хоһоон, "Уруйдан-айхаллан, Олоҥхо ыһыаҕа!" кырачааннар ортолоругар сахалыы мааны таҥас-сап мода, "Оһуор үҥкүүтэ Оһуохай" конкустарга оҕолор хамаҕатык кыттыыны ыллылар. Асфальга уруһуйдар, көрдөөх-нардаах араас оонньуулар сэмэй бириистэринэн биһирэннилэр. Былаһааккаларынан оҕо саадтара уонна эбии үөрэхтээһин тэрилтэлэрэ бары маастар-кылаастары ыыттылар: кумахха, өстүөкүлэ тааска, альбомҥа уруһуйдааһын, оҕунан ытыы, араас матырыйаалларынан кырыйыы, сыһыарыы, киэргэтии, араас кубиктарынан, матырыйаалларынан таҥан ойуулааһын, саахыматтааһын, ракетаны көтүтүү, таабырыннары таайыы уонна атын араас олус интэриэһинэй, оҕолор, оннооҕор улахан дьон болҕомтотун тартылар. Хас сайын ахсын, үтүө үгэскэ кубулуйбут, Куба бэлиэлээх сайыҥҥы фонтан, "Баар буоллун өрүүтүн Күн!" ырыанан флеш-моб кэннэ үөрүүлээх быһыыга-майгыга холбонно. Быйылгы Оҕо көмсүкэлин бырааһынньыга биир ураты сонун сүүрээни саҕалаата - ол курдук, Нам улууһун оскуолаларын активистарын этэрээттэрэ Саха сиригэр Пионерия тэриллибитэ 95 сылын чэрчитинэн, киин болуоссакка аалай хаалтыстаах, горнаах, барабааннаах уонна Кыһыл знамялаах пионердар, баһаатайдар хаамсан киирдилэр. Олоххо көхтөөх, куруутун үтүө ситиһии аргыстаах буолууга көҕүлүүр Активистар хамсааһыннарын этэрээттэрэ көрөөччүлэргэ, биир саастыылаахтарыгар тэтимнээх, чаҕылхай концерт көрдөрдүлэр. Үөрүүлээх оҕо бырааһынньыгын Нам улууһун оҕо Социальнай-реабилитационнай киинин "Чөл олох" фестивала түмүктээтэ.